Вашингтон, 21 март 2025 (МИА) – Американското Министерство за одбрана денеска објави нови упатства за тоа како ќе ја спроведе забраната на американскиот претседател Доналд Трамп за трансродовите лица да служат во војска и побара од федералниот судија да ја поништи неговата неодамнешна наредба за блокирање на забраната.
Во меморандумот од Канцеларијата на потсекретарот за одбрана се наведува дека Министерството за одбрана ќе ги прегледа медицинските досиеја на припадниците на војската и ќе им достави прашалници за самооценување во рок од 45 дена за да утврди дали имаат моментална дијагноза, историја или симптоми на родова дисфорија што би ги направило неподобни за продолжување на службата.
Родовата дисфорија е силна вознемиреност што ја чувствува една личност поради несовпаѓање помеѓу нивниот родов идентитет односно личното чувство за сопствениот пол и полот доделен при раѓање
Во меморандумот се наведува дека исклучувањето на лицата со симптоми на родова дисфорија се однесува само на оние со „нагласена неусогласеност и клинички значајна вознемиреност или оштетување најмалку шест месеци, повикувајќи се на Дијагностички и статистички прирачник за ментални нарушувања на Американската психијатриска асоцијација.
Исто така, се наведува дека во моментов не може да стапи на сила бидејќи наредбата на американската окружна судијка Ана Рејес во Вашингтон во средата ја блокираше забраната на администрацијата на Трамп како одговор на тужбата на трансродовите сегашни и идни воени членови.
Адвокатите на Министерството за правда во денешното поднесување побараа од Рејес да ја укине наредбата.
Тие изјавија дека наредбата на Рејес погрешно утврдила дека политиката ги дискриминира луѓето врз основа на нивниот трансродов идентитет и дека упатствата јасно покажуваат дека тие се засноваат на медицинска дијагноза.
Од Марија Спасовска Извор МИА
