Министерството за внатрешни работи (МВР) најави дека ќе ги информира граѓаните за новите правила кои ќе стапат на сила од 12. октомври, со цел да се избегнат застои на патните премини. Директорот на Бирото за јавна безбедност, Александар Јанев, истакна дека се во постојана комуникација со европските партнери и дека граѓаните ќе бидат обврзани да пополнуваат онлајн апликации за патување.
„Разговараме на дневна основа како сето тоа да биде олеснето и подостапно за нашите граѓани. Се согласувам, најголем проблем може да бидат патните премини кај нашите соседи кои се дел од Европската унија. Затоа, наша обврска е да ги информираме граѓаните комплетно, какви апликации треба да поднесат“, рече Јанев.
Според актуелната регулатива, онлајн апликацијата ќе биде кратка, но важна, со важност од две години. Јанев нагласи дека кога ќе бидат добиени официјалните информации од ЕУ, тие ќе бидат споделени со јавноста.
Системот за влез/излез (EES) ќе започне со имплементација на 12 октомври 2025 година, а во период од шест месеци ќе го усвојат 29 европски земји. Целосната имплементација е планирана за 10 април 2026 година, кога електронски ќе се пресметуваат деновите на престој. Во моментот, патниците не треба да преземаат никакви акции во врска со вториот систем, ETIAS, а Европската Унија ќе објави дополнителни информации за неговото лансирање неколку месеци пред стартот.
