Министерот за транспорт и врски, Александар Николовски, изрази загриженост за високите цени на становите во Штип и другите урбани центри. Според него, актуелната ситуација не е одржлива, особено за младите кои се соочуваат со тешкотии при купување на недвижности. „Нема економска логика во високите цени на становите. Младите не можат да си дозволат куќа или стан, а тоа е проблем кој мора да се реши“, изјави Николовски.
По завршувањето на Локалните избори, министерот најави дека ќе се преземат мерки за намалување на цените на становите, со цел да се олесни пристапот на младите до живеалиште. „Цените на становите одеднаш пораснаа, а реално малку е оние кои купуваат по тие цени. Потребно е да се спуштаат цените“, додаде тој.
Николовски истакна дека во фокусот на владините активности е поддршката за младите, како и реализацијата на инфраструктурни проекти. Меѓу нив, се работи на изградба на брана на река Отиња, уредување на бања Кежовица и реконструкција на улици и патишта. „Плановите за Штип се амбициозни. Браната Отиња треба да стане важен проект за Источна Македонија, слично како што е Мавровското езеро за Западна Македонија“, заклучи Николовски.
