Во населбата Козле, во скопски Карпош, се одвиваат последните подготовки за отворањето на Центарот за дневен престој на лицата со попреченост. Овој иновативен проект, кој ќе понуди инклузивно и функционално опкружување, е резултат на заедничката соработка помеѓу Здружението за здрав раст и развој – „Неуроклиник“, Министерството за социјална политика, демографија и млади, Светска банка и Општина Карпош.
Центарот ќе обезбеди стручна грижа, психосоцијална поддршка, социјализација и развој на животни вештини за лицата со попреченост. Овој проект не само што претставува значаен чекор кон унапредување на системот за поддршка, туку и создава нови можности за интеграција и развој на индивидуалните потенцијали на корисниците.
Договорот за меѓусебна соработка, кој го потпишаа локалната самоуправа и „Неуроклиник“ во мај минатата година, е основа за реализација на овој проект. Центарот моментално е во фаза на лиценцирање, а по завршувањето на овој процес, јавноста ќе биде информирана за официјалното отворање.
Локацијата на Центарот е на улица Јуриј Гагарин бр. 60 1/1. За дополнителни информации и интерес за вклучување, граѓаните можат да се обратат на телефонскиот број 078 336 537 или на мејл адресата: neuroclinic.mkd@gmail.com. Овој проект е важен чекор кон создавање на хумано општество, кое ги препознава и одговара на потребите на сите граѓани.
