Општина Струмица активно учествуваше на завршната регионална конференција под наслов „Партнерство за подобрување на квалитетот на воздухот во Западен Балкан“, која се одржа во Сараево, Босна и Херцеговина. Конференцијата беше организирана од UNICEF, Шведската агенција за заштита на животната средина (Swedish EPA) и Шведскиот метеоролошки и хидролошки институт (SMHI).
Како една од избраните општини од регионот, Струмица имаше можност да ги презентира своите искуства и мерки за намалување на загадувањето на воздухот. На конференцијата беа споделени резултатите од мерењата и анализите на квалитетот на воздухот, како и изработениот инвентар на емисии. Овие информации се од особена важност за разбирање на актуелната состојба и напорите на општината во борбата против загадувањето.
Во рамките на презентацијата, Струмица истакна и значајни инвестиции во електричен јавен превоз, развој на велосипедска инфраструктура, како и субвенции за користење на чисти извори на енергија. Дополнително, изградбата на новиот парк во населбата Карпош беше нагласена како важна мерка за унапредување на урбаната животна средина.
Учеството на оваа конференција не само што е признание за досегашните активности на Општина Струмица, туку и потврда за нејзината посветеност кон подобрување на квалитетот на воздухот и заштитата на животната средина. Овие напори се од клучно значење за создавање на поздрави и поодржливи услови за живот за сите граѓани.
