Градоначалничката на општина Неготино, Марија Нацева, денеска присуствуваше на Отворениот ден во СОУ „Св. Кирил и Методиј“, каде што училиштето ги отвори вратите за сите заинтересирани ученици и родители. Оваа иницијатива им овозможи на посетителите да се запознаат со условите за запишување, наставниот план и програмата, како и со ресурсите и опремата на располагање за професорите и учениците.
На поставените штандови, професорите и актуелните ученици им презентираа на идните средношколци различните профили и технички услови со кои располага училиштето. Посетителите имаа можност да разговараат со предметните професори и да добијат информации за предностите на образованието во оваа институција, кое нуди одлични можности за понатамошно студирање или вработување.
Во своето обраќање, градоначалничката Нацева истакна дека квалитетните услови за образовен процес и добрите технички насоки се клучни при изборот на средно училиште. Таа нагласи дека СОУ „Св. Кирил и Методиј“ располага со најсовремени услови за учење и ги охрабри идните средношколци да го направат вистинскиот избор и да продолжат со образованието во оваа угледна институција во Неготино.
