На 89-годишна возраст почина Габи Новак, една од најзначајните и најпрепознатливи пејачки на хрватската музичка сцена. Тажната вест ја потврдија од „Croatia Records“ за порталот 24sata.
Габи Новак е родена на 8 јули 1936 година во Берлин, каде го поминала дел од своето детство. Подоцна со семејството се преселила на островот Хвар, а потоа во Загреб, каде завршила Уметничко училиште, отсек графика. Кратко време работела како цртач во студиото за цртан филм на „Загреб филм“.
Нејзината музичка кариера започнала кон крајот на 1950-тите години, а топлиот и препознатлив глас брзо ѝ ја донел љубовта на публиката и признанијата од критиката. Веќе во 1960-тите станала една од најпопуларните пејачки во регионот.
Во текот на богатата кариера снимила бројни албуми и синглови, соработувајќи со врвни композитори и музичари. Добитничка е на повеќе награди „Порин“, меѓу кои за најдобра џез изведба, албум на годината, најдобар женски вокал, најдобар поп-албум и најдобра вокална соработка. Во 2006 година ја доби и наградата „Порин“ за животно дело.
Била во брак со композиторот Стипица Калогјера, а по нивниот развод во 1970 година, на 30 март 1973 се омажила за кантавторот Арсен Дедиќ. Со него останала во брак и уметничко партнерство сè до неговата смрт во 2015 година. Од бракот го имаат синот Матија Дедиќ, истакнат џез пијанист, кој почина во јуни оваа година.
