Силен тропски циклон со разорна моќ го зафати источниот дел на Мадагаскар, оставајќи зад себе човечки жртви и сериозни материјални штети. Според официјалните податоци на локалните власти, најмалку 20 лица го загубиле животот откако невремето со ветрови до 250 километри на час ги урнало нивните домови.
Најтешко погодена е главната пристанишна област Тоамасина, каде улиците се претворени во урнатини. Голем број куќи се срамнети со земја, дрвјата се искорнати, а електричната и комуникациската инфраструктура е сериозно оштетена. Повеќе населби останаа без струја и вода, што дополнително ја отежнува состојбата на терен.
Спасувачките служби и армијата веќе работат на евакуација на населението, додека стотици семејства се сместени во привремени засолништа. Со оглед дека во градот живеат околу 400.000 жители, властите стравуваат од дополнителни ризици доколку временските услови не се стабилизираат.
Експертите предупредуваат дека ваквите екстремни временски појави стануваат сè почести, а нивниот интензитет се поврзува со климатските промени. Меѓународните хуманитарни организации веќе подготвуваат помош за погодените региони.
