Во текот на минатата година, ширум светот продадени се 91.935.010 нови патнички автомобили и лесни комерцијални возила, објави GlobalData. Аналитичарите истакнуваат дека оваа бројка за 3,6 проценти го надминува резултатот од 2024 година, кога беа продадени 88.637.460 нови возила. Кина останува глобален лидер во продажбата на нови автомобили: во 2025 година, во оваа земја 26.887.094 возила добија првиот сопственик, што претставува раст од 5,6 проценти во однос на претходната година.
САД заземаат второ место на листата, со 16.325.284 продадени нови патнички автомобили и лесни комерцијални возила, што е раст од 2,5 проценти. Следат западноевропските пазари, на кои продадени се 13.416.422 нови автомобили и доставни возила, со скромен раст од 0,3 проценти во однос на 2024. Дилерите во источна Европа продале вкупно 4.691.409 возила, што е раст од 0,4 проценти во однос на претходната година.
Во Индија, продадени се рекордни 4.529.913 нови патнички автомобили (+5,7 проценти), но точниот број на испорачани лесни комерцијални возила не е познат. Се знае само дека вкупно продадени се повеќе од милион комерцијални возила, што значи дека треба да се смета на неколку стотини илјади возила со тежина до 3,5 тони. Најголем раст во продажбата (+8,8 проценти) забележаа јужноамериканските пазари, кои „проголтаа“ 3.124.215 нови патнички и лесни комерцијални возила.
На листата на најголемите автомобилски пазари во светот на крајот од 2025 година се наоѓаат и Јапонија, каде продадени се 4.528.323 единици (+3,3%), Канада со резултат од 1.867.618 возила (+3,2%) и Јужна Кореја со резултат од 1.654.978 примероци (+3,5%). Според сè уште неофицијалните податоци, Toyota останува најпродаваниот автомобилски бренд на светот, додека Toyota RAV4 е бестселер меѓу моделите, пред Toyota Corolla и Tesla Model Y.
