Земјите-членки на НАТО мора правично да го делат товарот на одбранбените трошоци за алијансата да остане силна, обединета и подготвена да одврати секоја закана. Оваа порака ја испрати заменичката генерален секретар на НАТО, Радмила Шекеринска, од Дубровник, во интервју за хрватската национална телевизија ХРТ.
„Самитот на НАТО беше историски. Тој го зајакна и трансформираше сојузот. Нашата цел беше да создадеме пофер систем за распределба на обврските и поефикасен механизам за одвраќање“, изјави Шекеринска.
Таа потенцира дека сите 32 сојузнички држави се согласија дека Русија и тероризмот остануваат најголемите безбедносни закани за евроатлантската заедница. Особен акцент стави на важноста од поддршката на Украина.
„Вложувањето во безбедноста на Украина е вложување во нашата безбедност. Тоа е првата линија на одбрана. Ако сакаме мир, мораме да бидеме подготвени да дејствуваме“, рече Шекеринска.
НАТО-земјите се согласија и на амбициозна цел: 5% од националните одбранбени буџети да бидат наменети за модернизација, вооружување и стратешки капацитети.
„Не е доволно само да имаме пари. Мора да покажеме дека сме способни за дејствување“, подвлече таа.
Воената помош за Украина, според Шекеринска, веќе ја надминала минатогодишната ветена сума, достигнувајќи над 50 милијарди евра. Таа ја истакна клучната улога на САД, но и нагласи дека и другите членки значајно ја зголемиле својата поддршка.
