На 36. седница на Советот на Општина Тетово која се одржа на 26 август минатата година, како точка 11 од Дневниот ред беше усвоена предлог-одлуката за формирање на Работна група за преименување на улици во Општина Тетово. Страшо Пинџур, Кузман Јосифовски – Питу, Радован Цониќ, Гоце Делчев, Тодор Циповски – Мерџан, Видое Смилевски Бато, Ѓорче Петров, Ѓоце Стојчески се само мал дел од македонските херои по кои се именувани улици во Тетово па во пресрет на преименувањето на улиците Сојузот на борци на Тетово испрати писмо до градоначалникот Касами.
-Ова писмо е јавен израз на најостра реакција, предупредување и споделување на длабока загриженост на државотворниот Сојуз на борците од народноослободителната и антифашистичката војна и граѓаните продолжувачи од Тетово, а поради повторните вознемирувачки најави на градоначалникот на општина Тетово г. Билал Касами за промена на имињата на улиците во градот и определување на имиња на претходно неименувани улици на територијата на општината, се вели во писмото на тетовскиот Сојуз на борци.
Од Сојузот на борци јавно апелираат и до државниот врв, особено Владата веднаш да го осуети овој срамен обид за креирање немир во Тетово, инициран и поттикнат од националистот Билал Касами.
Општина Тетово има формирано работна група за именување и преименување улици, плоштади, паркови и некои инфраструктурни објекти. Во првата фаза е направен регистар на сите улици, по што треба да се распише јавен оглас за предлози со имиња, кои потоа треба да поминат во Советот и на владина седница. Во писмото Сојузот на борци од Тетово го потсетуваат Касами дека постапката што ја отпочнал е со закон забранета да се одвива во период од шест месеци пред одржувањето избори.
