Србија планира да го врати воениот рок, објави претседателот Александар Вучиќ, изразувајќи загриженост поради наводното создавање на воени алијанси насочени против неговата земја. Според најавите, обврзното служење војска ќе биде воведено до крајот на 2026 или почетокот на 2027 година, по состанокот со воените лидери.
Воената служба во Србија беше укината во 2011 година, но остана опција за доброволно служење. Вучиќ нагласи дека ситуацијата во регионот е загрижувачка и дека Србија мора да реагира одговорно, без да предизвикува конфликти, но со цел да одврати потенцијални агресори.
„Забележавме значителен пораст на воените капацитети, особено во воздухопловството и противвоздушната одбрана. Нашите инвестиции во одбраната достигнуваат рекордни 2,65% од БДП, а повеќе од половината од тие средства се наменети за нови инвестиции“, изјави Вучиќ.
Во однос на деталите за воениот рок, Вучиќ истакна дека ќе трае 75 дена. Тој објасни дека моментално се работи на подготовките, вклучувајќи обновување на регрутационите центри и подобрување на медицинските установи. „Сакаме да обезбедиме најдобри услови за младите луѓе, за да стекнат чувство на одговорност и патриотизам“, додаде тој.
Вучиќ не наведе конкретни имиња на држави кои би можеле да бидат дел од овие воени алијанси, но нагласи дека Србија ќе продолжи да се однесува одговорно и сериозно во однос на безбедноста на својата територија. Оваа одлука за враќање на воениот рок доаѓа во време на зголемени тензији во регионот, што дополнително ја зголемува загриженоста на српските власти.
