Американскиот претседател Доналд Трамп потпиша указ со кој се забранува влез во САД за државјани на 12 земји, со цел – како што изјави – „заштита од странски терористи и безбедносни закани“. Указот стапува на сила на 9 јуни 2025 година.
На листата на целосно забранети земји се: Авганистан, Мјанмар, Чад, Конго, Екваторијална Гвинеја, Еритреја, Хаити, Либан, Иран, Сомалија, Судан и Јемен.
За државјани на Бурунди, Куба, Лаос, Сиера Леоне, Того, Туркменистан и Венецуела е воведена делумна забрана, што значи ограничен пристап или специфични категории визи.
„Отсега ќе им дозволиме влез само на оние кои немаат намера да нè повредат“, изјави Трамп, најавувајќи дека листата ќе се ревидира и можно е вклучување на дополнителни држави во иднина.
Важна забелешка е дека визите издадени пред 9 јуни нема да бидат поништени.
Ова не е првпат Трамп да воведе вакви мерки. Во текот на својот прв мандат, тој донесе слична забрана за седум земји со мнозинско муслиманско население – забрана што беше оспорувана пред суд и на крајот укината од Врховниот суд во 2018 година. И неговиот претходник Џо Бајден воведе ограничувања за неколку земји во 2021 година, вклучувајќи Иран, Либија, Сомалија, Сирија и Јемен.
Трамп изјави дека „најстрогите ограничувања се однесуваат на земји кои не можат да потврдат идентитет на патниците, имаат слаба контрола врз криминални активности и терористички закани“.
Како пример за ризик од недоволна проверка, тој го наведе последниот инцидент во Колорадо, каде што египетски државјанин фрлил молотови коктели врз произраелски собир.
Сепак, ограничувањата нема да важат за учесници на големи меѓународни спортски настани што ќе се одржат во САД, вклучително и Светското фудбалско првенство 2026 и Олимписките игри во Лос Анџелес 2028.
