Сараево, 23 мај 2025 (МИА) – На Инфективната клиника во Сараево изминатите денови се лекувани десет пациенти со симптоми на лептоспироза, објави босанскиот портал Кликс (Klix.ba) повикувајќи се на неофицијални извори.
Првите случаи се регистрирани во сараевска општина Нови Град. Неофицијално, болеста се проширила во овој дел од градот преку водата. За да се спречи понатамошно ширење на заразата во неколку сараевски општини се спроведува дератизација.
Лептоспироза е заразна болест предизвикана од бактерија од родот лептоспира и се пренесува преку контакт со вода, почва или храна контаминирана со урина од заразени животни, особено глодари. Инфекцијата се јавува кога бактеријата влегуваат во телото преку оштетена кожа или преку сулзокожата (очи, нос и уста).
Симптомите вклучуваат висока температура, главоболка, болки во мускулите, замор и повраќање, а во тешки случаи може да се појави оштетување на црниот дроб и бубрезите и воспаление на мозочните мембрани (менингитис).
Ако лептоспирозата не се лекува може да предиузвика сериозни последици, вклучително и смрт.
Експертите советуваат да се избегнува контакт со потенцијално контаминирани површини, да се користи заштитна опрема во ризичните области и редовна контрола на штетници и одржување на хигиената.
Од Марина Илиевска Извор МИА
