Во текот на вчерашниот ден, во периодот од 14:00 до 22:00 часот, на подрачјето на општина Аеродром била спроведена зајакната полициска контрола, во која учествувале службеници од СВР Скопје, Одделението за безбедност на патниот сообраќај и Единицата за недозволена трговија со дрога.
За време на акцијата, на повеќе локации биле лишени од слобода две лица од Скопје, на возраст од 21 и 33 години, откако кај нив била пронајдена и одземена марихуана. Во друг случај, кај 26-годишен скопјанец бил пронајден и одземен нож, додека полицијата одзела и еден мотоцикл поради сомнение дека станува збор за фалсификувано возило.
Паралелно со безбедносните проверки, сообраќајната полиција спровела и контрола на учесниците во сообраќајот, при што биле евидентирани 37 сообраќајни прекршоци. Дел од санкциите се однесуваат на управување возило без возачка дозвола, истечена регистрација и возење под дејство на алкохол.
Во рамки на акцијата биле контролирани 55 моторни возила, легитимирани исто толку лица, а извршен бил и преглед на 48 возила. Од полицијата најавуваат дека ваквите засилени контроли ќе продолжат и во наредниот период, со цел зголемување на јавната и сообраќајната безбедност.
