Во недела, на 26 октомври, во 3:00 часот, завршува летното сметање на времето и започнува зимското. Стрелките на часовникот ќе се поместат еден час наназад, што значи дека времето во 3:00 часот ќе се смета како 2:00 часот. Оваа одлука, како што информираат од Министерството за енергетика, рударство и минерални суровини, е донесена во согласност со годишната практика за регулирање на сметањето на времето и има за цел да се усогласи со европската регулатива.
Зимското сметање на времето започнува секој последен викенд во октомври и трае до последниот викенд во март следната година, кога повторно ќе се врати летното сметање. Овој систем на сметање на времето е во употреба во многу европски земји, но не и во Исланд, Русија и Белорусија.
Иако Европскиот парламент на 4 март 2019 година изгласа укинување на сезонското поместување на времето од 2021 година, Советот на ЕУ сè уште не донел конечна одлука. Сезонското менување на времето е во практика и во многу држави од Северна и Централна Америка, но не се применува во Јапонија, Кина, Јужна Кореја, ниту во земјите од африканскиот континент.
