Општина Кичево и Општина Пустец официјално го потврдија своето збратимување, што претставува значаен чекор во развојот на меѓусебните односи и соработка. Оваа важна настан се одржа за време на официјалната посета на делегацијата од Кичево, предводена од градоначалникот Д-р Александар Јовановски, во Општина Пустец, Република Албанија.
Во составот на делегацијата беа и пратеникот Ѓорѓија Сајкоски, заменик-министерот за јавна администрација Лазе Јаќимоски, како и претставници од здружението „ЗОШТО“. Домаќин на средбата беше градоначалникот на Пустец, Пали Колефски. Оваа средба не само што ја потврди пријателската врска помеѓу двете општини, туку и ја унапреди со цел да се создадат нови можности за соработка во различни области.
Делегацијата имаше можност да посети значајни институции и културно-историски обележја во Општина Пустец, вклучувајќи Основното училиште „Трајан Колевски“, Црквата „Св. Архангел Михаил“, бистата на Гоце Делчев и Музејот на писателот Стерјо Спасе. Овие посети дополнително ја зацврстија врската помеѓу двете општини и испратија силна порака за важноста на добрососедските односи.
Збратимувањето помеѓу Кичево и Пустец е основа за развој на партнерства насочени кон размена на искуства, институционална поддршка и реализација на заеднички иницијативи. Оваа соработка ќе се фокусира на образованието, културата, локалниот развој и туризмот, создавајќи нови можности за поврзување на граѓаните на двете општини.
Со оваа иницијатива, Кичево и Пустец се стремат кон градење на трајни мостови на соработка и пријателство, засновани на заедничка историја и искрена подготвеност за напредок.
