Адвокатот Јовица Страшевски преку објава на социјалните мрежи упати јавен повик до премиерот Христијан Мицкоски и до Владата да дадат одговор за актуелната состојба со горивата во земјата.
Во својот статус, Страшевски прашува како е можно речиси сите бензински станици во исто време да останат без гориво и дали станува збор за реален недостиг или за можна координирана манипулација на пазарот.
„Граѓаните со право бараат одговори од Владата за актуелната нафтена криза. Како е можно речиси сите бензински станици во исто време да останат без гориво? Дали станува збор за реален недостиг или за координирана манипулација на пазарот?“, наведува Страшевски.
Тој бара Владата итно да испрати инспекциски служби и да се изврши контрола кај сите нафтени компании.
Според него, особено загрижувачки е сценариото во кое денес нема гориво, а веќе следниот ден истото повторно се појавува по повисоки цени.
„Недозволиво е денес да нема гориво, а од утре истото да се појави по повисоки цени. Тоа создава сериозен сомнеж дека станува збор за класична пљачка врз грбот на граѓаните“, пишува адвокатот.
Во својата објава Страшевски поставува и директно прашање до институциите:
„Со амин или без амин на Владата?“
Тој додава дека граѓаните не смеат да бидат жртви на евентуални договори и профитерство на пазарот на нафтени деривати и бара итна реакција, транспарентност и одговорност од институциите.
