Вчера градоначалникот на Општина Куманово Максим Димитриевски оствари средба со амбасадорот на Кралството Шведска Н.Е. Ола Золстром и постојаниот претставник на УНДП Armen Grigoryan. На средбата се разговараше за стабилните односи, кои ќе продолжат да се спроведуваат преку нови проекти во различни области, со цел подобар животен стандард на граѓаните.
На средбата со претставници на општинската администрација и претседателката на Совет на Општината, присуствуваа и програмскиот директор во Амбасада на Кралството Шведска, проектен менаџер и службеник за мониторинг на УНДП. Присутните дискутираа за значењето на проектот „Справување со загадувањето на воздухот“, кој се спроведува по Програмата за развој на Обединетите нации – УНДП, во партнерство со Министерството за животна средина и просторно планирање и Општините Куманово, Гостивар, Струмица, Кавадарци и Струга. Проектот е дел од рамковната Програма, финансирана од Кралството Шведска.
Главна цел на проектот е поддршка на локалните власти во пет пилот општини, во насока на откривање и мерење на изворите на загадување и воздухот, идентификација и спроведување на соодветни мерки за решавање на проблемите.
Се реализираше и посета на централниот објект на општинските училишта “Браќа Миладиновци” и “Крсте Мисирков”, со цел увид на поставената нова енергетско – ефикасна фасада. Присутните го посетија и УОМО “Панче Пешев”, каде што по проектот училиштето ќе добие нова фасада, прозорци и реконструкција на кровниот покривач. Во идејното решение за фасадите на двете училишта учествуваа самите ученици, по пат на гласање.
