Вашингтон, 30 јуни 2024 (МИА) – Американскиот претседателот Џо Бајден денеска во Камп Дејвид ќе разговара со своето семејство за иднината на неговата кампања за реизбор. По дебатата што се емитуваше на Си-Ен-Ен во четвртокот, многу демократи изразија загриженост околу неговата способност да го победи поранешниот претседател Доналд Трамп, пренесува Ен-Би-Си Њуз.
Патувањето на Бајден било планирано пред дебатата во четвртокот. Тој и првата дама Џил Бајден им се придружија таму на своите деца и внуци.
Досега, највисоките партиски лидери му изразија јавна поддршка на Бајден, вклучувајќи објави на Твитер од поранешните претседатели Барак Обама и Бил Клинтон. Високи конгресни демократи, вклучувајќи ги Хаким Џефрис од Њујорк, Џим Клајбурн од Јужна Каролина и Ненси Пелоси од Калифорнија, приватно изразиле загриженост за неговата одржливост, велат два извори запознаени со тие разговори, иако сите јавно го поддржуваат претседателот.
Еден демократски член на Претставничкиот дом, кој верува дека Бајден треба да се повлече од трката, но сè уште не го кажал тоа јавно, изјави за Ен-Би-Си Њуз дека тројца негови колеги му го изразиле истиот став за време на гласањето во Претставничкиот дом во петокот.
Челниците на домот јавно не се поколебаа, а нивните соработници демантираа дека зад затворени врати изразиле сомнежи.
– Пелоси има голема доверба во претседателот Бајден и со нетрпение очекува да присуствува на неговата инаугурација на 20 јануари 2025 година, изјави Иан Крегер, портпарол на поранешната претседателка на Претставничкиот дом. – Секоја сугестија дека таа тргнала во поинаков процес едноставно не е вистинита, додаде тој.
Кристи Стивенсон, портпаролка на Џефрис, лидерот на малцинството во Претставничкиот дом, рече дека нејзиниот шеф “повеќе пати јасно и јавно и приватно изразил поддршка за претседателот Џо Бајден и демократската листа од врв до дно”.
Бријана Фриас изјави дека Клајбурн, кој патува во Висконсин овој викенд за кампањата на претседателот, „има целосна доверба во претседателот Џо Бајден и тимот Бајден-Харис”.
– Секоја извештај во кој се тврди дека конгресменот изразил што било освен цврста поддршка за претседателот Бајден е целосно невистинит, рече Фриас.
Во исто време, меѓу највисоките демократи постои разбирање дека на Бајден му треба простор за да ги одреди следните чекори. Тие веруваат дека само претседателот, во договор со своето семејство, може да одлучи дали ќе продолжи или ќе ја заврши својата кампања рано, и дека нема добро да реагира ако се чувствува притиснат.
– Одлучувачите се две личности – претседателот и неговата сопруга, рече еден од изворите запознаен со разговорите, додавајќи: „Секој што не разбира колку ќе биде оваа одлука длабоко лична и семејна, не е запознаен со ситуацијата“.
Овој приказ на претседателот и неговата партија во криза само нешто повеќе од четири месеци пред изборите за кои тие велат дека ќе ја одредат судбината на демократијата, изваден е од интервјуа со повеќе од десетина демократски функционери, оперативци, соработници и донатори. Сите зборуваа под услов на анонимност за да опишат толку осетливи работи како дали актуелниот претседател може да се повлече од реизбор и како би можел да биде заменет на гласачкото ливче, наведува Ен-Би-Си Њуз.
И покрај возбудливиот говор на митинг во Северна Каролина во петокот, кој ги смири некои од неговите сојузници, Бајден беше опишан од една личност запознаена со неговото расположение како понижен, лишен од самодоверба и болно свесен дека неговите физички слики на дебатата – очи вперени во далечина, отворена уста – ќе живеат и по неговиот претседателски мандат, заедно со изведба што во одредени моменти беше збркана, некохерентна и тешка за слушање.
Друга личност запознаена со динамиката рече дека Бајден на крајот ќе слуша само еден советник.
Единствената личност која има најголемо влијание врз него е првата дама, рече оваа личност. „Ако таа одлучи дека треба да се промени курсот, ќе има промена на курсот“.
По објавувањето на овој извештај, познат извор се обрати и нагласи дека собирот во Камп Дејвид не е формален семеен состанок.
Се очекува секој разговор за кампањата да биде неформален или последователна мисла, рече изворот. – Никој не седи на формален или одлучувачки разговор, вели
Анитa Дан, една од најблиските советници на Бајден. Таа вчера за “The Weekend” на МСНБЦ рече дека Бајден не разговарал за повлекување од трката со своите соработници и дека интерните разговори се фокусирани на натамошен напредок.
Од Сања Костовска Извор МИА
