Поминаа 26 години од смртта на легендарниот македонски пејач, композитор и текстописец Јонче Христовски – уметник кој остави неизбришлива трага во македонската музичка историја.
Роден во Битола во 1931 година, Христовски беше еден од најпрепознатливите интерпретатори на македонската народна песна. Со својот уникатен стил и силна емоција во изведбите, успеа да ја доближи македонската песна до публиката не само дома, туку и ширум светот.
Неговото име засекогаш ќе остане поврзано со безвременската „Македонско девојче“, песна која доби бројни препеви на повеќе светски јазици и стана симбол на македонскиот мелос.
Во неговиот богат опус се вбројуваат и песни како „Животе мој“, „Ај засвирете ми чалгии“, „Запеј песна Македонко“, како и патриотските „Едно име имаме“, „Ој, Вардаре македонски“ и „Мој роден крај“, кои и денес живеат меѓу народот.
Христовски беше дел и од ансамблот „Танец“, каде што, покрај пејач, се истакна и како играорец и кореограф. Неговото влијание во македонската култура се чувствува и преку телевизиските проекти, меѓу кои и легендарната серија „Распеани градови“.
Неговиот живот бил обележан и со лична трагедија – загубата на сопругата во катастрофалниот земјотрес во Скопје во 1963 година, на која ѝ ја посветил емотивната песна „Животе мој“.
И денес, повеќе од две децении по неговата смрт, песните на Јонче Христовски остануваат дел од колективната меморија и идентитет на македонскиот народ.
