Повеќе од една и пол деценија жителите на неколку села во кривопаланечкиот регион живеат со ист проблем кој, како што велат, директно им ја загрозува егзистенцијата. Денес тие излегоа на мирен и достоинствен протест пред зградата на Општина Крива Паланка за да го изразат револтот поради неконтролираното движење на крупен добиток што со години им ги уништува нивите, посевите и дворовите.
На протестот присуствуваа жители од Трново, Добровница, Узем, Кркља, Варовиште, Дрење и Станци, како и граѓани од околните населени места кои велат дека проблемот одамна ја надминал границата на индивидуални штети и станал прашање на опстанок за многу семејства што живеат исклучиво од земјоделство. Тие сведочат за уништени земјоделски површини, оштетени помошни објекти и постојано чувство на страв и несигурност.
Дополнителна загриженост кај населението предизвикуваат, како што тврдат, заканите и заплашувањата со кои дел од оштетените се соочиле во обид да го заштитат својот имот. Според нив, материјалната штета е само еден дел од проблемот, додека психолошкиот притисок и неизвесноста околу секоја нова земјоделска сезона се подеднакво тешки.
Граѓаните порачаа дека пролетта е пред прагот и дека повторно стравуваат оти нивниот труд ќе биде уништен, поради што бараат итно и трајно решение со кое ќе се воспостави ред и одговорност. Нивната порака е дека повеќе нема простор за одложување и игнорирање на проблемот што трае со години.
Од Општина Крива Паланка информираат дека за случајот веќе постојат правосилни решенија и задолжителни мерки донесени од надлежните институции. Инспекциските надзори на Агенцијата за храна и ветеринарство констатирале прекршувања на прописите за заштита и благосостојба на животните, како и непочитување на претходно изречените мерки, што значи дека нивното спроведување не смее да биде доведено во прашање.
Граѓаните бараат координирана реакција од сите институции, целосно спроведување на законските обврски и решение кое трајно ќе го спречи повторувањето на ваквата состојба. Покрај штетите врз имотите и земјоделските култури, тие предупредуваат дека неконтролираното движење на добитокот претставува и сериозен ризик за безбедноста во сообраќајот.
Пораката од протестот беше јасна – жителите сакаат мирно да ја обработуваат својата земја, да го заштитат сопствениот имот и достоинствено да живеат од својот труд, без страв дека секоја нова сезона ќе значи нови загуби.
