Њујорк, 14 април 2025 (МИА) – Фармацевтската компанија Фајзер денеска го запре развојот на лек против обезност, откако беше откриено дека учесник во тестирањето на лекот претрпел оштетување на црниот дроб, што е потенцијално поврзано со лекот.
Компанијата соопшти дека ќе престане да го проучува „дануглипрон“ откако еден учесник во едно од испитувањата доживеал оштетување на црниот дроб предизвикано од лекови.
Верзијата на пилулата која се дава еднаш дневно беше во рано тестирање, а истражувачите се обидуваа да ја најдат најдобрата доза за пациентите, рече портпаролката на компанијата.
Фајзер планираше да го премести лекот во доцна фаза на тестирање, што обично е последната фаза на развој пред компанијата да поднесе потенцијален третман до владините регулатори за одобрување.
Официјален претставник на компанијата во соопштение рече дека Фајзер сè уште планира да развие други потенцијални третмани за обезност во рани фази на тестирање.
Лекувањето на обезност во моментов е еден од најпрофитабилните сектори за фармацевтските компании, но сите одобрени лекови досега се даваат со инјектирање, поради што компаниите се обидуваат да развијат орален третман.
Од Јасмина Тасевска Извор МИА
