Претседателот на СДСМ, д-р Венко Филипче, денеска остро реагираше на изјавите на премиерот Мицкоски, кој тврди дека државата е под хибриден напад од странски сили. Филипче предупреди дека таквите изјави се злоупотреба на безбедносната ситуација во земјата. „Мислам дека ниту еден премиер до сега не се осмелил вака да ја потресе ситуацијата во однос на безбедносната сфера на земјата“, нагласи тој.
Филипче истакна дека ако изјавите на Мицкоски се точни, институциите веднаш требало да реагираат. „Ако навистина сме под напад, тогаш требаше да заседава Советот за безбедност, да излезе Армијата и да се активираат сите безбедносни служби“, додаде тој, нагласувајќи дека ништо од тоа не се случило.
Според него, власта на ВМРО-ДПМНЕ не понудила никакви решенија за актуелните проблеми. „Од оваа влада не видовме ниту едно решење на ниту еден проблем. Сето ова, на што премиерот се вади, е практично само една пиаровска драма“, изјави Филипче.
Во одговор на новинарско прашање, тој повика на итна одговорност и оставки од министерот за здравство и министерот за внатрешни работи, поради несоодветното справување со пожарот во депонијата во Трубарево. „Треба да си поднесе оставка министерот за здравство. Ги излажа граѓаните дека воздухот не е загаден“, рече Филипче.
Тој нагласи дека е неопходна детална анализа на сите институции и депонии во државата, за да се спречи иднина еколошка или здравствена криза. „Имаат ли сите депонии лиценци? Работи ли некој нелегално со отпад?“, праша тој, додавајќи дека Владата не презела конкретни мерки по овие прашања.
Филипче истакна дека е потребна темелна анализа и на работата на градоначалниците од ВМРО-ДПМНЕ, кои не ги исполниле ветувањата дадени пред четири години. „Дали воопшто почнале да реализираат дел од тие ветувања? Сè што ветија е полошо, и сега гледаме трагични ситуации кои сериозно го загрозуваат здравјето на граѓаните“, заклучи претседателот на СДСМ.
