Индустрискиот промет во земјава во ноември 2025 година бележи умерен пад, покажуваат најновите податоци. Вкупниот промет е намален за 0,7 проценти во споредба со истиот месец лани, што укажува на забавување на индустриската активност на годишно ниво.
Анализата по главни индустриски групи покажува дека најголем пад е регистриран кај интермедијарните производи (без енергија), каде прометот е намален за 5,6 проценти, како и кај трајните производи за широка потрошувачка, со пад од 9,1 процент.
Од друга страна, одредени сегменти бележат раст – прометот кај капиталните производи е зголемен за 1,1 процент, додека кај нетрајните производи за широка потрошувачка е евидентиран пораст од 3,2 проценти.
На месечно ниво, споредбата меѓу ноември и октомври 2025 година покажува поизразено опаѓање – вкупниот индустриски промет е намален за 6,1 процент. Сепак, ако се погледне подолгиот период, јануари – ноември 2025 година, во однос на истиот период од 2024 година, вкупниот промет сепак бележи раст од 5,2 проценти.
Разликите меѓу домашниот и странските пазари се изразени. Прометот на домашниот пазар во ноември е намален за 4,5 проценти на годишно ниво, а во првите 11 месеци од годината падот изнесува 0,1 процент. Наспроти тоа, прометот на странските пазари бележи раст од 0,3 проценти во ноември, а кумулативно, за периодот јануари – ноември, растот достигнува 6,4 проценти.
Најголемо влијание врз падот на вкупниот индустриски промет имаат неколку клучни сектори, меѓу кои производството на електрична опрема со пад од 10,4 проценти, производството на метали со значителни 16,9 проценти, како и производството на машини и уреди со намалување од 4,9 проценти.
