Во вкупно 33 општини низ Македонија, меѓу кои и Градот Скопје, денеска се одржува вториот круг од локалните избори, на кои граѓаните избираат градоначалници за нов четиригодишен мандат. Гласањето започна утрово во 7 часот, а ќе трае до 19 часот, по што Државната изборна комисија ќе го започне процесот на пребројување и објавување на резултатите.
Право на глас имаат 1.013.375 граѓани. Вториот круг се одржува во општините каде што во првиот круг ниту еден кандидат не успеа да освои повеќе од 50 проценти од гласовите, односно потребното мнозинство за победа. На гласачките ливчиња денес се наоѓаат двајцата најдобропласирани кандидати од првиот круг.
Градоначалници денес се избираат во Скопје, Аеродром, Боговиње, Брвеница, Валандово, Виница, Дебар, Дебарца, Демир Капија, Дојран, Долнени, Зрновци, Карпош, Кичево, Конче, Кочани, Крушево, Куманово, Лозово, Македонска Каменица, Македонски Брод, Могила, Неготино, Пробиштип, Ранковце, Росоман, Струга, Студеничани, Тетово, Центар, Чешиново-Облешево, Чучер Сандево и Шуто Оризари.
Во Шуто Оризари, покрај гласањето за градоначалник, се спроведува и прегласување за советници на три избирачки места, поради нерегуларности утврдени од Државната изборна комисија. Како што соопшти ДИК, оваа одлука е донесена бидејќи резултатите од овие избирачки места може да влијаат врз конечната распределба на мандатите во Советот.
Вториот круг од овие локални избори е обележан со слаба родова застапеност – само три жени се кандидирани за градоначалничка функција, што претставува 2,2 проценти од вкупниот број кандидати. На овие избори се натпреваруваа 309 кандидати за градоначалници, од кои само 32 беа жени, што претставува 10,35 проценти. Во 16 општини и Градот Скопје во првиот круг имаше само по една жена кандидат.
Изборниот ден, според најавите на надлежните институции, засега минува мирно и без поголеми инциденти. Резултатите од гласањето ќе почнат да пристигнуваат по затворањето на избирачките места, а првичните проекции се очекуваат вечерва.
