Општина Карпош активно се вклучува во меѓународниот проект „FAIR GAME: Gender-equal Access to Movement and Exercise“, кој официјално стартуваше на дводневната конференција во Општина Пеќ. Оваа косовска општина е водечки партнер во проектот, финансиран од Европската Унија преку програмата CERV (Citizens, Equality, Rights and Values Programme), кој обединува општини и организации од различни европски земји.
Покрај Општина Карпош, во проектот учествуваат и партнери од Италија, Португалија, Хрватска, Босна и Херцеговина, Косово, како и меѓународната организација АЛДА. Претставниците од Секторот за развој на Општина Карпош, Александра Теова и Роберт Јанковски, активно учествуваа во работните сесии, разменувајќи позитивни искуства и добри практики на европско ниво.
Целта на проектот „FAIR GAME“ е да се промовира родовата еднаквост во спортот и да се зголеми учеството на жените и девојките во физичките активности. Оваа иницијатива ќе се реализира преку зајакната меѓународна соработка, размена на успешни модели и креирање на инклузивни политики на локално ниво.
На отворањето на конференцијата, директорката за култура, млади и спорт во Општина Пеќ, Џенет Сика, ја нагласи важноста на системската поддршка за еднаков пристап до спортот за сите. Конференцијата исто така разгледа клучни предизвици и локални бариери со кои се соочуваат жените и девојките при вклучување во спортски активности, а беа презентирани и европските перспективи и најдобрите практики од меѓународните партнери.
Посебен акцент беше ставен на улогата на локалните институции во креирањето и имплементацијата на инклузивни политики. Со своето учество, Општина Карпош ја потврдува својата заложба за промоција на еднаквоста, инклузивноста и динамичниот животен стил, како и за активно учество во европските иницијативи кои придонесуваат за подобрување на квалитетот на живот на граѓаните.
