Дали денес конечно ќе се одржи надзорна расправа за трагедијата во Кочани? Ова прашање стои како единствена точка на дневен ред на денешната седница на Постојаната анкетна комисија за заштита на слободите и правата на граѓанинот, по иницијатива на пратеникот и претседател на Комисијата, Димитар Апасиев.
Станува збор за трет обид на Левица да отвори парламентарен процес за утврдување институционална одговорност за трагичниот настан што го потресе Кочани и целата држава. Од успехот на иницијативата повторно ќе зависи и волјата на пратениците од ВМРО-ДПМНЕ, кои на 4 јуни, заедно со пратениците од коалициите ВРЕДИ и ЗНАМ, гласаа против ставата на точката на дневен ред.
Од Левица потсетуваат дека пратеникот Борислав Крмов уште на почетокот на април иницирал надзорна расправа, но тогашната иницијатива добила само шест потписи – сите од редовите на Левица – што било недоволно за нејзино процесирање во Собранието.
„Ова не е прашање на дневна политика, туку на јавен интерес и демократска отчетност“, порачуваат од Левица. Партијата апелира до парламентарното мнозинство, а особено до ВМРО-ДПМНЕ, да не го блокираат процесот, бидејќи, како што велат, „граѓаните, особено кочанчани, заслужуваат одговори“.
„Обврската за отчетност не е политичка опција, туку демократска должност. Пратениците од ВМРО-ДПМНЕ денес имаат шанса да докажат дека немаат што и кого да кријат“, се наведува во соопштението на Левица.
Очекувањата од денешната седница се големи, а исходот ќе биде лакмус-тест за подготвеноста на институциите да се соочат со сопствените пропусти и да ја вратат довербата на јавноста.
