Пекинг, 25 февруари 2025 (МИА) – Кина денеска оцени дека нејзините трошоци за одбрана се „апсолутно неопходни“ по изјавата на рускиот претседател Владимир Путин дека го одобрува предлогот на неговиот американски колега Доналд Трамп за преполовување на воените буџети на Москва, Вашингтон и Пекинг.
Американскиот претседател Доналд Трамп во средината на февруари предложи трите најголеми воени сили во светот да ги намалат воените трошоци за половина и рече дека планира да разговара со Москва и Пекинг откако ќе се решат конфликтите во Украина и на Блискиот Исток.
Рускиот претседател Путин вчера изјави дека предлогот е „добра идеја“.
„Можеме да склучиме договор со САД. САД би намалиле за 50 отсто, а ние за 50 отсто. Кина тогаш ќе ни се придружи, доколку сака“, рече Путин во телевизиско интервју, запрашан за воениот буџет на земјата.
Портпаролот на кинеското Министерство за надворешни работи Лин Џијан не одговори директно на барањето на новинарот да ги коментира зборовите на рускиот претседател.
„Кина е постојано ангажирана на патот на мирен развој, а нејзините ограничени трошоци за одбрана се апсолутно неопходни за зачувување на нејзиниот суверенитет, нејзината безбедност и нејзините развојни интереси, како и светскиот мир“, рече Џијан на редовната прес-конференција.
„Кина отсекогаш се придржувала до одбранбената стратегија заснована на самоодбрана… и не учествува во никаква трка во вооружување со ниту една земја“, изјави портпаролот на кинеското Министерство за надворешни работи.
Русија го зголеми својот воен буџет за да ги покрие трошоците за нападот врз Украина започнат пред три години.
САД сè уште се земјата со најголем воен буџет во светот, што минатата година изнесуваше 968 милијарди долари, пред Кина (235 милијарди долари) и Русија (145,9 милијарди долари), покажуваат податоците на Меѓународниот институт за стратешки студии (IISS) со седиште во Лондон.
Од Сашко Димевски Извор МИА
