Сиднеј, 25 февруари 2025 (МИА) – Кинеската морнарица во текот на изминатиот викенд (петок и сабота) одржа вежби во меѓународните води меѓу Австралија и Нов Зеланд, што австралиските власти го опишаа како „настан без преседан“.
Истовремено, бродот на американската крајбрежна стража „Миџет“, што го минуваше Тасманското Море како дел од соработката со Австралија и Нов Зеланд, знаеше дека кинески бродови се присутни во областа, но немаше никакви интеракции, изјави капетанот на бродот Метју Руни, пренесен од британските медиуми.
-Бевме свесни за нивното присуство. Тоа не влијаеше на нашите операции. Ги следиме меѓународните норми, прописите за да спречиме судири на море и не сме имале никакви средби и би очекувале кинеската морнарица да го стори истото, додаде Руни на прес конференција во Сиднеј.
Кинеските поморски вежби ги принудија авиокомпаниите да пренасочат 49 меѓународни летови поради безбедносни причини.
Австралиските и новозеландските власти го следеа движењето на кинеските бродови, додека американската крајбрежна стража го засили своето присуство во јужниот дел на Пацификот за да се бори против нелегалниот риболов.
Јуан Греам, висок аналитичар во Австралискиот институт за стратешка политика, рече дека тие се најјужните вежби што кинеската морнарица ги одржала и покажале дека на Кина не и треба поморска база во Јужниот Пацифик за да проектира моќ.
Кина најверојатно ја тестира дипломатската решителност на Австралија, Нов Зеланд и австралискиот безбедносен сојузник САД, рече тој.
-Ова е јасен сигнал дека Кина не се чувствува заплашена од дејствувањето во близина на САД, нивниот најблизок сојузник во Пацификот, рече тој.
Портпаролот на кинеското Министерство за надворешни работи изјави дека Воената морнарица на Народноослободителната војска спроведувала вежби и обука во далечни води и се придржувала до безбедносните стандарди во согласност со меѓународните закони и практики.
Американската крајбрежна стража ги зголеми операциите во јужниот дел на Тихиот Океан од 2024 година, патролирајќи заради контрола на нелегалниот риболов од далечни флоти, вклучително и оние од Кина, на покана на островските држави на Пацификот.
Од Сашко Димевски Извор МИА
