Не оти не треба, ако има пари и постои согласност помеѓу Македонската и Бугарската влада, нека има автопат или железница што ќе ги поврзува Македонија и Бугарија. Ама, дилемата – ќе има Коридор-8, ќе нема Коридор-8 што ќе ги поврзува железнички Македонија и Бугарија, откако Македонската влада се откажа, ја реши НАТО. Македонската влада уште на 2 јули 2024 година дала согласност за изградба на НАТО-коридор низ Македонија. На 10 јули 2024 година, министрите за одбрана на Македонија, Италија, Албанија и Бугарија – Владо Мисајловски, Гуидо Кросето, Нико Пелеши и Атанас Запријанов во Вашингтон, ставија потпис на писмото на намери за изградба на воен коридор за потребите на НАТО кој ќе ги поврзе овие држави. И толку од сите маки и за сите дилеми. Дефинитивно, Коридорот-8 треба да го биде! Со тунел, без тунел, тоа брзо ќе се реши. Прашањето е кој ќе даде пари и под какви услови?!
Потребата од изградба на Коридорот-8 е “заради олеснување, односно овозможување на побрз проток на воените сили и опрема на НАТО-Алијансата со што ќе се зголеми ефикасноста на воената логистика и операции, во случај на потреба. Иницијативата помеѓу Италија, Албанија, Македонија и Бугарија воспоставува хармонизиран коридор за воена мобилност во рамките на Паневропскиот коридор 8. Иницијативата овозможува поедноставување на националните процедури за граничен премин, особено во услови на криза и ќе претставува практичен придонес кон напорите на НАТО-Алијансата за зајакнување на одвраќањето и одбраната на целата територија, придонес за зајакнување на воената мобилност во Европа, како и кон зајакнувањето на соработката меѓу НАТО и Европската Унија. Идејата е овозможување брз транспорт на војска и воени средства преку конкретна траса низ Македонија, односно низ четирите држави, со избегнување на сложени бирократски процедури за да може, како што се смета, брзо да се реагира во кризни, конфликтни или други ситуации. Исто така, дефинирањето на трасите за движење на војската и опремата треба да овозможи полесно и побрзо пристигнување на воениот полигон Криволак,“ – така вели Македонското министерство за одбрана.
На 19 октомври 2024 година, на вториот ден од состанокот на министрите за одбрана на земјите членки на НАТО во Брисел, во рамките на размената на мислења за достигнувањата, развојот на способностите, логистиката, операциите и капацитетите во однос на Концептот за одвраќање и одбрана на НАТО во рамки на Евроатлантската област, Македонија, Романија, Италија, Албанија и Бугарија потпишаа Анекс на Писмото на намери за хармонизирање на Коридорот-8, по изразената намера на Романија да се приклучи на оваа Иницијатива, од особена важност за олеснување на воената мобилност со цел одвраќање и одбрана на источното крило на НАТО-Алијансата.
И логичко е учеството на Романија во изградбата на Коридорот-8, имајќи предвид дека во Романија од март 2024 година почна да се гради најголемата воена база на НАТО на Балканот, која по капацитет ќе ги надмине сите, освен онаа во германскиот град Рамштајн. Во проширувањето на аеродромот “Михаил Когалничеану“ ќе бидат инвестирани 2,5 милијарди евра, бидејќи тој се наоѓа во близината на пристанишниот град Констанца, на брегот на Црно Море, со намера НАТО оттаму да ги контролира Русија и нејзината флота.
Николае Кречу, командант на 57. воздухопловна база “Михаил Когалничеану“, вели дека неговата единица е подготвена да прими нови војници на НАТО, од кои веќе има околу 5.000, повеќето Американци. Се градат капацитети за копнените сили и специјалните единици, но и за сите војници и видови оружје неопходни за брза реакција. Со големина на мал град, на површина од речиси 3.000 хектари, со периметар од 30 километри околу неа, таа локација ќе може трајно да смести 10.000 војници на НАТО со нивните семејства. Проектот вклучува писти, платформи за оружје, хангари за воени авиони, како и училишта, градинки, продавници, па дури и болница. Веќе се градат пристапни патишта, а следен чекор е изградба на нова писта, паралелна со постојната. Тие ќе бидат поврзани, а до нив ќе има нови такси-патишта и паркинг-места. Планирано е аеродромот да може да ги смести сите видови авиони со кои располага НАТО, вклучувајќи ги и најтешките транспортни авиони. Таа база ќе стане најважната постојана воена структура на НАТО во непосредна близина на конфликтот во јужна Украина, за кој некои аналитичари веруваат ќе биде долгорочен. Кога базата во Романија ќе биде завршена, таа наводно ќе биде 20 отсто поголема од онаа во Рамштајн, Германија, која моментално е најголема база на НАТО во Европа. Се очекува новата база целосно да функционира до 2040 година. Американските трупи ја користеа базата “Михаил Когалничеану“ од 1999 година. Во моментов таму има војници од 101-та воздушно-десантна дивизија и борбени авиони на НАТО што извршуваат воздушни полициски мисии. Романија долго време беше клучен центар за операциите на НАТО во регионот на Црно Море. Илјадници американски војници се распоредени во Романија за да вршат обука и безбедносни мисии од почетокот на војната во Украина.
САД имаат четири воени бази во Европа, со аеродроми во Велика Британија и Германија. “Рамштајн“ е најголем аеродром во Германија и има две писти, од 3.200 и 2.830 метри, таму се стационирани околу 35.000 војници и 4.000 цивилни специјалци. Во “Рамштајн“ се чуваат околу 150 нуклеарни боеви глави, а големината на новата база во Романија укажува дека и таму може да се појави атомско оружје. Американците чуваат неколку ескадрили на ловци и бомбардери во “Рамштајн“, а таму е стационирана командата за транспортни авиони, па затоа е најважната претоварна точка за транспорт на американско оружје и војници во Европа. Најголемата американска воена болница се наоѓа во блискиот Ландстул.
