На Скопје му се заканува еколошка катастрофа, а актуелната власт не покажува ниту капацитет ниту знаење за справување со ситуацијата, изјави портпаролката на СДСМ, Богданка Кузеска, на денешната прес-конференција. Таа истакна дека неспособноста да се контролираат пожарите во Дрисла, Вардариште и Трубарево е срамота за државата и власт која тоне во хаос.
„Македонија е веќе опасно место за живеење. Повеќе од 500 илјади жители на Скопје и околината се изложени на опасност и здравствен ризик поради отровниот чад од пожарите. Властите се кријат зад измислени приказни за хибридни напади. ВМРО-токсична создаде хаос кој граѓаните го плаќаат со најскапото нешто, нивното здравје“, рече Кузеска.
Таа обвини дека додека скопјани се изложени на канцерогени материи, ниту една институција не реагираше навреме. Според неа, властите закаснија со своите реакции. „Додека граѓаните вдишуваа загаден воздух, на властите им беше поважно да ја обвинуваат опозицијата, наместо да реагираат веднаш и соодветно. Ниту една институција не излезе навреме да информира за основните информации и препораки за тоа како да се заштитат граѓаните“, додаде таа.
Кузеска истакна дека СДСМ и претседателот на партијата, д-р Венко Филипче, беа првите кои реагираа и дадоа препораки до граѓаните за заштита. „По бурните реакции, Министерството за здравство излезе со некакви препораки, но не ги соопшти конкретните подрачја со ризик од загаден воздух. Скопјани сè уште не знаат колку е загадувањето, кои се опасните канцерогени материи и колкав е ризикот од оваа еколошка бомба“, заклучи портпаролката на СДСМ.
