Од Левица остро реагираат на најавената одлука на Владата предводена од ВМРО-ДПМНЕ и премиерот Христијан Мицкоски за издавање дополнителни 10.000 дозволи за престој и работа на странски државјани, оценувајќи дека ваквата политика директно ја поткопува борбата за повисоки плати и ги загрозува правата на домашните работници.
Според партијата, наместо мерки кои ќе го задржат младото и работоспособно население во земјата и ќе создадат услови за достоинствен труд, Владата избира модел кој се темели на увоз на евтина работна сила, со што, како што наведуваат, се притискаат платите надолу и се обезбедува поголем профит за крупниот капитал.
Левица смета дека со оваа одлука извршната власт отворено застанува на страната на работодавачите, прифаќајќи ја логиката дека вредноста на трудот треба да се намалува, а не да се зголемува. Во реакцијата се наведува дека ваквиот пристап ја девалвира работата на македонските работници и ја претвора државата во сервис на економски елити, меѓу кои се посочува и Бранко Азески, за кого тврдат дека има значително влијание врз економските политики без директен изборен легитимитет.
Партијата дополнително оценува дека одлуката е индикатор оти Владата нема намера да ја зголеми минималната плата, туку да создаде таканаречена „резервна армија на работна сила“, во услови кога голем број македонски граѓани ја напуштаат земјата поради, како што велат, понижувачки ниски примања.
Во соопштението се отвора и поширока тема, при што Левица предупредува дека увозот на работна сила има и геополитичка димензија, наведувајќи дека во јавноста веќе се појавуваат најави за можен прилив на мигранти од Велика Британија. Според нив, ваквите политики ризикуваат Македонија да ја претворат во резервоар на евтина работна сила и прифатен центар за туѓи социјални проблеми, додека сопствените граѓани продолжуваат да ја напуштаат земјата во потрага по подобри услови за живот и работа.
