Педесет и петгодишен жител на селото Пепелиште, неготинско, бил лишен од слобода откако со автомобил удрил пешак, а при проверките било утврдено дека возел под дејство на алкохол и покрај активна забрана за управување возило.
Како што информираат од полицијата, на 12 април 2026 година околу 14 часот, полициски службеници од ОВР Неготино го привеле Л.Д. (55) од село Пепелиште. Според информациите, тој управувал патничко возило „југо“ со неготински регистарски ознаки, кога удрил во пешакот Р.М. (62), исто така од селото Пепелиште.
Во несреќата пешакот се здобил со телесни повреди, кои биле констатирани во Итната медицинска помош во Неготино.
По преземените мерки и извршените проверки, било утврдено дека возачот бил под дејство на алкохол, при што му биле измерени 2,76 промили алкохол во крвта. Дополнително, било констатирано и дека возилото го управувал иако имал активна забрана за управување.
По насоки на јавен обвинител, лицето било задржано во полициска станица, возилото било одземено, а по целосното документирање на случајот против него ќе биде поднесена соодветна пријава.
