Во текот на 2024 година во земјава биле активни 73.310 претпријатија, а најголем дел од нив работеле во секторот трговија на големо и трговија на мало, како и поправка на моторни возила и мотоцикли.
Според објавените претходни податоци, токму овој сектор имал најголемо учество во вкупниот број активни претпријатија, односно 29,2 проценти.
Структурата според бројот на вработени покажува дека македонската економија и натаму главно се потпира на мали компании. Дури 81 процент од активните претпријатија имале од 1 до 9 вработени, што ги прави убедливо најзастапена категорија.
Покрај нив, 9,6 проценти отпаѓаат на претпријатија без вработени и на субјекти кај кои не е утврден бројот на вработени. Компаниите со 10 до 19 вработени учествуваат со 4,3 проценти, додека претпријатијата со 20 до 49 вработени имаат удел од 2,9 проценти.
Во категоријата 50 до 249 вработени спаѓаат 1,9 проценти од активните претпријатија, а само 0,3 проценти се големи компании со над 250 вработени.
Податоците уште еднаш потврдуваат дека домашната бизнис-структура е доминантно составена од микро и мали претпријатија, додека големите компании имаат минимално учество во вкупниот број активни деловни субјекти.
