Одделот за внатрешна контрола, криминалистички истраги и професионални стандарди при МВР поднел кривична пријава по брза постапка против К.Ш., вработен како полицаец во Полициската станица за општа надлежност Струмица, поради сомнение за сторено кривично дело „злоупотреба на службена должност и овластување“.
Како што соопшти МВР, против пријавениот веќе се определени и мерки на претпазливост од страна на судија во претходна постапка.
Според наводите, случајот се однесува на настан од 11 април 2026 година околу 9 часот, кога полицаецот, постапувајќи по пријава за нарушен јавен ред и мир со физички напад, наместо службено да го процесуира предметот, наводно посредувал меѓу страните за негово „мирно решавање“.
Притоа, како што се наведува, тој неовластено побарал исплата на пари, при што било договорено пријавителот да му исплати 1.000 евра на оштетениот за да се откаже од пријавата. Потоа, според пријавата, полицискиот службеник самоволно ја зголемил сумата за уште 200 евра, образложувајќи ги како наводни трошоци за постапката.
Од вкупно договорените 1.200 евра, на оштетениот му биле предадени 700 евра, додека преостанатите 500 евра полицаецот ги задржал за себе, стекнувајќи противправна имотна корист, наведуваат од МВР.
Покрај кривичната пријава, Одделот за внатрешна контрола најави и поднесување предлог за поведување постапка за кршење на работниот ред и дисциплина, како и изрекување задолжителна мерка за отстранување од работното место до завршување на дисциплинската постапка.
