Инспекциските служби на Агенцијата за храна и ветеринарство (АХВ) уништија 1.010 килограми небезбедна храна при контролите спроведени неделава кај оператори регистрирани како објекти за производство и промет со „здрава храна“.
Во рамки на 373 извршени контроли, утврдено е дека 14 оператори воопшто не биле регистрирани како оператори со храна во Агенцијата. За констатираните неправилности се издадени 65 решенија, 19 опомени и 44 парични казни, во вкупна вредност од 20.550 евра во денарска противвредност.
Контролите покажале сериозни пропусти во работењето. Кај девет оператори биле утврдени незадоволителни хигиенски и технички услови, додека кај седум објекти била пронајдена храна со поминат рок на употреба. Дополнително, кај двајца оператори инспекторите откриле и производи со непознато потекло.
Неправилности имало и во означувањето на производите – несоодветно декларирана храна била констатирана кај 18 оператори, а кај 23 објекти вработените немале задолжителен здравствен преглед.
Дел од операторите не ги спроведувале ни основните стандарди за безбедност на храната. Кај двајца не биле воспоставени процедури за Добра производствена и Добра хигиенска пракса, ниту се водела соодветна документација, додека кај исто толку објекти не била извршена задолжителната дезинфекција, дезинсекција и дератизација.
Од АХВ најавуваат дека контролите продолжуваат со засилен интензитет со цел заштита на здравјето на граѓаните.
