Осмиумот, најредок стабилен елемент во Земјината кора, денес се смета за најскапиот метал на светот, со вредност која може да биде и до 400 пати поголема од онаа на златото. Неговата исклучителна густина, отпорност на корозија и реткост го прават исклучително ценет во индустријата и во луксузниот накит.
Благодарение на методот за кристализација развиен од швајцарски научници, осмиумот стана безбеден за обработка и употреба, што дополнително ја зголеми неговата побарувачка.
На листата на најскапи метали веднаш зад него се наоѓа родиумот, чија цена може да достигне до 4.000 долари по грам, а годишното производство е помало од еден тон. Потоа следуваат паладиумот, кој е клучен за автомобилската индустрија и електрониката, иридиумот – познат по својата отпорност на хемиски влијанија, и златото, кое и покрај својата популарност е на петтото место.
Поради ограничената понуда, осмиумот станува интересен и за инвеститорите. На пазарот се појавуваат таканаречени инвестициони дискови, чија цена може да се движи од неколку илјади до над 150.000 долари, зависно од нивната големина и чистота.
Освен во накитот, овој метал има примена и во високопрецизни технолошки уреди и во одредени медицински апликации, што дополнително ја оправдува неговата висока цена.
