Една кратка посета на Дубровник на еден турист му се претворила во скапа лекција, откако осум месеци подоцна добил казна од дури 1.580 евра.
Причината не била сообраќајна несреќа или брзо возење, туку – влез со автомобил во строго заштитената стара градска језгра.
Градот веќе со години применува строги правила за сообраќај околу историскиот центар. Влезот е дозволен само за возила со специјални дозволи, додека сите останати се евидентираат преку систем за видео надзор. Камерите автоматски ги регистрираат табличките и казните се испраќаат подоцна, често и месеци по посетата.
Токму тоа му се случило на еден корисник на Reddit, кој ја споделил својата приказна.
„Минатиот јуни бев во Дубровник и изнајмив автомобил. Влегов во Стариот град за да стигнам до платен паркинг. Сега добив казна од 1.580 евра. Дали е ова можно?“, напишал тој.
Според официјалните правила на градските власти, казните за неовластен влез се високи:
- 260 евра за физички лица
- 660 евра за претприемачи
- 1.320 евра за правни лица
Проблемот е што секое поминување се казнува посебно, па ако возачот влегол повеќе пати, износот лесно може да достигне четирицифрена сума.
Во овој случај, коментаторите посочиле дека можеби се работи за две одделни казни – една за компанијата за изнајмување возила и една за самиот возач, што ја објаснува високата бројка.
Градските власти одамна советуваат посетителите да користат јавен превоз или паркинзи надвор од старото јадро, токму за да се избегнат гужвите, загадувањето и ваквите непријатни изненадувања.
Поуката е јасна: во туристичките зони со камери – секој погрешен влез може скапо да чини.
