Србија значително ги зголеми своите златни резерви, кои достигнаа историски максимум од 53.084,8 килограми, соопшти централната банка. Вредноста на ова злато изнесува 7,13 милијарди евра и сочинува речиси четвртина, односно 24,3 проценти од вкупните девизни резерви на земјата.
Само во текот на јануари биле набавени дополнителни 46 златни полуги на домашниот пазар, што претставува најголема месечна куповина досега. Со тоа, резервите се зголемени за 577 килограми, а дополнителен раст е регистриран и поради поскапувањето на златото на светските берзи.
Бруто девизните резерви на централната банка на крајот од месецот достигнале 29,4 милијарди евра, што обезбедува стабилна покриеност на паричната маса и речиси седум месеци увоз на стоки и услуги.
Од банката оценуваат дека зголемените резерви претставуваат заштита од глобални економски турбуленции и дополнителна сигурност за финансискиот систем.
