Денешниот ден ќе помине во претежно облачно време, со услови за повремени локални врнежи од дожд во крајните северозападни и југоисточни делови од земјата. На повисоките планински подрачја се очекуваат слаби врнежи од снег.
Ќе дува умерен југоисточен ветер, кој долж Повардарието повремено ќе биде и поизразен. Утринските температури ќе се движат меѓу 3 и 7 степени, додека дневните максимални ќе достигнат од 8 до 12 Целзиусови степени.
Во главниот град претпладне ќе преовладува променливо облачно време со појава на магла, додека попладне се очекуваат сончеви периоди, но и услови за повремени локални врнежи од дожд. Минималната температура ќе се спушти до 3 степени, а максималната ќе достигне околу 12 степени.
Според најавите, пообилни врнежи од дожд и услови за ретки грмежи се очекуваат утре, а нестабилното време ќе продолжи и во вторник, сè до вечерните часови.
Во среда претпладне ќе има повеќе сончеви периоди, но во текот на попладнето облачноста повторно ќе се зголемува. Во текот на ноќта и во четврток се најавува нов бран на врнежи од дожд, додека на планините повторно ќе има снег.
