Од Министерство за внатрешни работи – Оддел за гранични работи и миграција информираат дека е доставена официјална најава за јавен протест во организација на асоцијацијата Макам-транс, кој треба да започне на 26 јануари 2026 година во 12:00 часот.
Според најавата, протестните активности ќе се одвиваат на повеќе гранични премини и тоа: Деве Баир, Делчево, Ново Село, Дојран, Богородица, Меџитлија, Ќафасан, Блаце и Блато.
Протестот ќе се реализира преку ограничување на сообраќајот за товарни моторни возила, односно со затворање на коловозните ленти и терминалите наменети за товарен сообраќај. Истовремено, патничкиот сообраќај ќе се одвива непречено на сите наведени гранични премини.
Од страна на организаторот е најавено дека протестот може да трае до седум дена, со можност за негово порано прекинување доколку се надминат причините поради кои е организиран.
МВР соопштува дека, во рамки на своите законски надлежности, ќе преземе соодветни мерки за одржување на јавниот ред и мир, како и за обезбедување безбеден и непречен сообраќај, со посебен приоритет на движењето на патничките возила, автобусите, како и возилата што превезуваат лекови, жива стока, опасни материи и други итни пратки.
Од Министерството апелираат до граѓаните и превозниците навремено да се информираат за состојбата на граничните премини, да ја следат официјалната комуникација и, доколку е потребно, да користат алтернативни гранични премини.
