Од утре, 1 февруари, официјално започнува со работа системот „Безбеден град“, преку кој автоматски ќе се евидентираат и санкционираат сообраќајните прекршоци детектирани од паметни камери. Според најавата на Министерство за внатрешни работи, првата фаза ќе се спроведува во Скопје, Куманово и Тетово, како и долж главните сообраќајни правци Коридор 8 и Коридор 10.
Со стартот на системот, казните повеќе нема да зависат исклучиво од физичко присуство на полиција – прекршоците ќе се регистрираат автоматски, врз основа на видео и софтверска анализа.
Во почетната фаза ќе се следат четири најчести сообраќајни прекршоци: непрописно паркирање, возење со брзина над дозволената, минување на црвено светло и управување возило со истечена сообраќајна дозвола.
Од МВР порачуваат дека станува збор за систем кој треба да придонесе за намалување на сообраќајните несреќи, подобра дисциплина во сообраќајот и заштита на човечки животи. Камерите се поставени на локации што важат за ризични точки – раскрсници, булевари и делници каде најчесто се регистрираат прекршувања на правилата.
Властите апелираат граѓаните да ги почитуваат прописите и да возат внимателно, бидејќи санкционирањето ќе биде континуирано и без исклучоци. Новиот систем, според надлежните, не е наменет за „казнување по секоја цена“, туку за создавање побезбедни улици и патишта.
