Олимписките медали од Зимските игри Милано–Кортине 2026 не поставуваат рекорд само на спортските терени – туку и по својата материјална вредност. Поради наглиот раст на цените на благородните метали, овогодинешните одличја важат за најскапи во историјата на модерните Олимписки игри.
Според актуелните пазарни пресметки, вредноста на златниот медал се движи меѓу 2.100 и 2.200 американски долари, додека сребрениот достигнува од 1.200 до 1.300 долари. Тоа е повеќе од двојно зголемување во споредба со медалите од Париз 2024.
Иако златниот медал тежи околу половина килограм, во него има само околу шест грама чисто злато – остатокот е сребро. Но токму скокот на цената на златото и среброто на светските берзи ја крева вкупната вредност. Со моменталните цени од околу 5.000 долари за унца злато и 76 долари за унца сребро, пресметките покажуваат дека материјалот во медалите никогаш не вредел повеќе.
Интересно е што количеството злато во олимписките медали речиси не се променило со децении. Разликата денес ја прави исклучиво цената на металите. Ако се направи споредба со првите Зимски олимписки игри во Шамони во 1924 година, тогашните шест грама злато во медалот вределе околу пет долари – денес истата количина достигнува вредност од речиси илјада.
Сепак, за спортистите вистинската цена на медалот не се мери во долари. Тој останува симбол на години труд, дисциплина и жртва. Но зад најголемото спортско признание стои и една јасна економска порака – движењето на цената на златото директно се пресликува дури и во најпрестижните светски трофеи.
