Светска банка објави нова прогноза за глобалниот економски раст во 2026 година, која покажува оптимизам и покрај постојаните геополитички кризи. Во извештајот “Глобални економски перспективи”, банката ја зголеми прогнозата за раст од 2,3% на 2,6%. Според проценките, глобалниот економски раст во 2025 година изнесуваше 2,7%, што укажува на незначително забавување во тековната година.
Извештајот истакнува дека глобалната економија покажала поголема отпорност отколку што се очекуваше, и покрај зголемените трговски тензиции и политичка несигурност. Во текот на минатата година, економската активност беше поддржана од зголемувањето на залихите, силниот апетит на инвеститорите за ризик и значителниот раст на инвестициите во вештачка интелигенција. Иако растот бил побрз од предвидениот, постојат големи разлики помеѓу земјите.
Развиените економии во голема мера забележале силен опоравок, со речиси 90% од нив над нивото на доход по жител пред пандемијата. Сепак, повеќе од четвртина од земјите во развој и на пазарите во настанување сè уште не го достигнале нивото од 2019 година, особено најсиромашните земји и оние со институционална нестабилност. Заменикот главен економист на Светска банка, Ајхан Козе, предупредува дека економскиот раст се забавил, со стапки од 2,6% до 2,8% од 2023 година до денес, што е значително помалку од просекот од 3,2% во деценијата пред пандемијата.
Во 2026 година, глобалната инфлација би можела да се намали на 2,6%, што е за 0,3 процентни поени помалку од претходно очекуваното. Проектирано е дека цената на нафтата од марката Брент ќе падне на 60 долари по барел во 2026 година, во споредба со просекот од 69 долари во 2025 година. Создавањето нови работни места останува приоритет, особено со оглед на тоа што 1,2 милијарди млади луѓе ќе влезат на работниот пазар во земјите во развој во следната деценија.
