Родители на ученици од ООУ „Крсте Петков Мисирков“ во Куманово покренаа иницијатива за промени во наставните програми, изразувајќи незадоволство од начинот на нивната имплементација и од содржината на дел од наставните материјали.
Иницијативата следи по допис испратен од Советот на родители до Министерството за образование и наука и Бирото за развој на образованието, во кој се посочуваат низа забелешки поврзани со новата концепција за основно образование. Според нив, одговорот од надлежните институции не ги адресирал клучните прашања што ги покренале.
Во меѓувреме, родителите започнале и јавна петиција со која бараат повлекување на наставните планови и програми донесени во рамки на новата концепција за основно образование.
Во образложението на иницијативата се наведува дека постојат сериозни проблеми во начинот на спроведување на реформите, вклучително и преоптовареност на учениците со наставни содржини, недостиг од соодветна инфраструктура и ресурси, како и недоволна вклученост на стручната и пошироката јавност во процесот.
Дополнително, дел од родителите изразуваат загриженост и за одредени содржини во наставните програми, оценувајќи дека тие не се соодветни за учениците. Од Коалицијата за заштита на децата, која ја поддржува иницијативата, упатија повик до родителите активно да се вклучат во процесот и да го изразат својот став.
Барањето, како што информираат иницијаторите, е веќе доставено до надлежните институции со архивски број 02-490/1 од 16 декември 2025 година.
Засега нема официјален одговор од Министерството за образование и наука во однос на новата петиција, а се очекува во наредниот период да има дополнителни реакции и од институциите и од стручната јавност.
