Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до Основното јавно обвинителство Делчево против В.М., поради сомнение за сторено кривично дело „оддавање службена тајна“ од член 360 од Кривичниот законик.
Според МВР, пријавената, која била вработена како полицаец–приправник во Одделението за полиција при СВР Штип, на 10 јули 2025 година остварила телефонска комуникација со лице користејќи телефонски број кој го употребувал нејзиниот брат. Во разговорот, таа му соопштила информации за планирани и тековни полициски дејствија за извидување со дрон, кои биле дел од оперативна акција и претставувале службена тајна.
Со откривањето на овие информации, кои можеле да имаат сериозни штетни последици по полициската работа и безбедноста на акцијата, пријавената, според надлежните, го сторила кривичното дело „оддавање службена тајна“.
Од Министерството за внатрешни работи информираат дека покрај кривичната пријава, Одделот за внатрешна контрола ќе поднесе и предлог за поведување постапка за утврдување дисциплинска одговорност против В.М., во согласност со законските и интерните прописи.
