Полицијата во Скопје вчера спроведе засилена сообраќајна контрола насочена кон возачите на моторцикли, мопеди, трицикли и четирицикли, при што биле изречени вкупно 91 санкција за различни прекршоци.
Како што информираат од Министерството за внатрешни работи, контролата била реализирана на подрачјето на Центар, Аеродром, Бит Пазар и Чаир, во периодот од 11:00 до 20:00 часот, од страна на Одделението за безбедност на патниот сообраќај при СВР Скопје, во соработка со Одделението за сообраќајно ескортно обезбедување.
Во рамки на акцијата биле поднесени седум кривични пријави за безобѕирно управување со моторно возило. Од нив, шест се однесуваат на лица кои управувале возило без возачка дозвола, додека една пријава е поднесена за возач кој управувал мотоцикл под дејство на алкохол со повеќе од 1,50 промили алкохол во крвта. Три од пријавите се поднесени против малолетни лица.
Дополнително, полицијата изрекла:
- 17 санкции за управување возило во несоодветна категорија
- 13 казни за возење мопед без возачка потврда
- 43 санкции за возење без заштитен шлем (кацига)
- 3 мерки за управување нерегистриран мотоцикл
- 1 санкција за возење мотоцикл под дејство на алкохол
- 7 санкции за други прекршоци
Во текот на контролата бил одземен еден мотоцикл поради безобѕирно управување, а два мотоцикли биле привремено одземени затоа што биле нерегистрирани повеќе од шест месеци.
Од МВР најавуваат дека сообраќајните контроли ќе продолжат и во наредниот период, со цел зголемување на безбедноста на патиштата.
Истовремено, полицијата апелира до сите учесници во сообраќајот да ги почитуваат правилата и прописите, со што ќе придонесат за побезбедно одвивање на сообраќајот.
