Кандидатката за градоначалничка на Град Скопје, Каја Шукова, денеска ја посети манастирот Богородица во Матка по повод значајниот православен празник – Успение на Пресвета Богородица. На овој важен настан, ѝ се придружија секретарот на СДСМ, Александар Саша Димитријевиќ, и потпретседателката на партијата, Ана Чупевска.
Во чест на празникот, Шукова упати искрени честитки до сите сограѓани и православни верници, нагласувајќи дека овој ден има длабоко значење за Скопје и неговите жители. „На сите сограѓани и на сите православни верници им го честитам големиот празник Успение на Пресвета Богородица – заштитничката на нашето Скопје. Овој ден е повеќе од верски празник. Тој е симбол на верата, надежта и љубовта – вредности кои секогаш нè обединуваат и ни даваат сила да продолжиме напред,“ изјави Шукова.
Таа истакна дека овој празник треба да биде потсетник за важноста на добрината и сочувството, кои се основа на секое општество. „Празникот нека ни донесе спокој, мир и благосостојба во нашите семејства. Нека биде потсетник дека Скопје е наш заеднички дом, кој ќе остане силен и жив доколку сите заедно се грижиме еден за друг и за вредностите што нè спојуваат,“ додаде таа.
На крајот, Шукова заврши со порака на љубов и надеж: „Со љубов кон луѓето и со надеж за иднината, нека ни е честит празникот Успение на Пресвета Богородица.”
