Скопјани, особено оние кои живеат или се движат низ општините Карпош и Центар, последниве денови сè почесто пријавуваат напади од страна на гаврани. Според граѓаните, птиците агресивно се спуштаат над нивните глави, особено во утринските и попладневните часови, без провокација или видлива причина.
„Само што поминав покрај паркчето кај Лептокарија, и едниот гавран буквално ми слета на грб. Не е првпат да ме нападнат“, вели жителка на Карпош.
Во вторникот била нападната жителка на Општина Карпош која се здобила со повреди на главата.
Граѓаните се загрижени бидејќи нападите најчесто се случуваат во близина на училишта, паркови и фреквентни улици, што претставува опасност особено за децата и постарите лица. Според орнитолози, ова однесување е најверојатно поврзано со сезоната на парење, кога гавраните се особено територијални и ги бранат своите гнезда.
Жителите бараат од надлежните институции да извршат контрола и проценка на ситуацијата, со цел да се најде безбедно решение што ќе го заштити и населението и животинскиот свет.
